"Azəri Layt ("Azeri Light") markalı Azərbaycan nefti artıq 50 dollardan da aşağı satılır. Amma bu o demək deyil ki, elə həmin 50 dollar qazanc kimi büdcəmizə daxil olur".

Axar.az xəbər verir ki, bu açıqlama ilə iqtisadçı ekspert Natiq Cəfərli çıxış edib. Ekspertin sözlərinə görə, hazırda Azərbaycan nefti maya dəyərindən 2 dəfə artıq qazanc gətirir:

"Azəri Layt markalı Azərbaycan nefti artıq 50 dollardan da aşağı satılır. Amma bu o demək deyil ki, elə həmin 50 dollar qazanc kimi büdcəmizə daxil olur. Ölkəmizdə hasil olunan neftin maya dəyəri və Ceyhan limanına qədər tranzit xərcləri hər barrel üçün 12 dollardır. Limandan tankerlərə vurulma və daşınma xərci isə hər barrel üçün 1 dollardır. Deməli, 13 dollar bunun mayasıdır. Hasil olunan neftin 75 faizi Azərbaycana, 25 faizi isə BP-yə çatır. Bir sözlə, 50 dollar olan Azəri Layt markalı Azərbaycan neftinin 13 dollar maya dəyərini hesaba qatsaq, xalis qazanc 37 dollardır. Bunun da hər barreldə 8,5 dolları xarici şirkətlərin payına düşür. Deməli, bu günə ölkəmizin hər barreldən qazancı cəmi 28,5 dollardır. Yuxarıda qeyd etdiyim xərclər neftin qiymətindən asılı olmayaraq sabit qalırdı, yəni qiymət 100 dollar olanda da xərclər hər barrel üçün, təqribən, 13 dollar idi".