Ana səhifə Kult |
"Sehirli xalat" filminin 50 illik yubileyində iştirak edən əfsanəvi Zərifə obrazının ifaçısı Solmaz Hətəmova ötən illərdən söhbət açıb.
Solmaz xanım Axar.az-a filmə çəkildiyi vaxt 13 yaşının olduğunu bildirib:
"Bu film üçün gəlib bizi məktəbdən seçmişdilər. Çox yaxşı xatırlayıram. Hərdən o filmə baxanda ona bir film kimi yox, elə baxıram, elə bil orada baş verənləri gerçəkdə yaşamışam. Filmin hər dəqiqəsi mənə uşaqlıq illərimi xatırladır. Sözün düzü, mənim hansısa filmə çəkilmək marağım olmayıb, amma "Sehirli xalat" filmindən təklif gələndə razılaşdım. Bu isə ilk və son dəfə çəkildiyim film oldu. Əslində, sonradan filmlərə çəkilmək istəyirdim, ancaq valideyinlərim icazə vermədilər. Onu deyim ki, uşaq vaxtı musiqi məktəbində oxumuşam. Gözəl də səsim vardı. Xanəndə olmaq istəyirdim; ona da icazə vermədilər. Sonra həkim olmaq istədim, o da alınmadı. Neft Akademiyasına daxil oldum".
Zərifə xanım filmdə rol almış aktyorlardan da söz açıb:
"İndi, demək olar ki, o filmdə rol alan aktyorların çoxu dünyasını dəyişib! Qalan dostlarla da çox gec-gec görüşürük. Daha çox Almaz Mustafayeva ilə ünsiyyətimiz olur. Bəzi dostlarımız isə xaricdə yaşayır".
Xatırladaq ki, bir neçə nəslin sevimli ekran əsəri olan və Kinostudiyanın ən uğurlu uşaq filmlərindən sayılan "Sehrli xalat"ın yubileyi noyabrın 5-də qeyd edilib.
Tarix
2014.11.13 / 14:29
|
Müəllif
Nigar İsmayılqızı
|