Ana səhifə Gündəm |
Avqustun 14-də Silahlı Qüvvələrin Təlim və Tədris Mərkəzində Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiklərinə görə Azərbaycan Respublikası Prezidentinin Sərəncamı ilə ölümlərindən sonra təltif edilmiş Silahlı Qüvvələrin hərbi qulluqçularının ailələrinə döyüş medalları təqdim edilib.
Axar.az Müdafiə Nazirliyininin mətbuat xidmətinə istinadən xəbər verir ki, mərasim başlamazdan əvvəl şəhidlərin xatirəsi bir dəqiqəlik sükutla yad edilib. "Şəhidlər elegiyası" ifa edildikdən sonra Müdafiə Nazirliyinin zabiti polkovnik Abdulla Qurbanov Şəhid zabitlər Fikrət Akif oğlu Məmmədov, İlqar Tapdıq oğlu Verdiyev, Elnur Cəfər oğlu Cəfərov və Ceyhun Pirəli oğlu Orucəliyevin keçdikləri qısa, lakin şərəfli döyüş yolundan danışıb.
Müdafiə nazirinin müavini general-leytenant Kərim Vəliyev şəhidlərin valideynlərini Müdafiə naziri general-polkovnik Zakir Həsənovun və nazirliyin rəhbərliyi adından salamlayaraq onlara vətənə layiq övladlar böyütdüklərinə görə minnətdarlığını bildirib.
Nazir müavini qeyd edib ki, Vətən uğrunda şəhid olanlar heç vaxt unudulmur, xalqın yaddaşında əbədi yaşayır, onların xatirələri əziz tutulur, adları əbədiləşdirilir.
Azərbaycan Respublikasının Prezidenti cənab İlham Əliyevin sərəncamı oxunduqdan sonra döyüş medalları alqış sədaları altıda şəhid ailələrinə təqdim edilib.
Şəhid İlqar Verdiyevin təltif olunduğu "Hərbi xidmətlərə görə"
medalı 11 yaşlı oğlu Kamranın yaxasına sancılanda şəhid övladının
dediyi "Təki Vətən sağ olsun!" sözləri mərasim iştirakçılarına
duyğulu anlar yaşatdı.
Şəhid Fikrət Məmmədovun həyat yoldaşı Xəyalə Məmmədova, İlqar
Verdiyevin atası Tapdıq müəllim, Elnur Cəfərovun qardaşı Zamiq
Cəfər oğlu, Ceyhun Orucəliyevin atası Pirəli müəllim ölkə
Prezidentinə və Müdafiə Nazirliyinin rəhbərliyinə göstərdikləri
diqqət və qayğıya görə minnətdarlıq ediblər.
Tarix
2014.08.14 / 16:45
|
Müəllif
Axar.az
|