Türkiyənin Xarici İşlər naziri Əhməd Davudoğlu dinləmə iddiaları ilə bağlı Almaniya Xarici İşlər naziri ilə görüşəcəyini bildirib.

Axar.az xəbər verir ki, Davudoğlu "İddialar gerçəkdirsə, bizə ən tutarlı izahat verilməlidir", - deyə hadisəyə münasibətini bildirib. Davudoğlu qeyd edib ki, hadisə ilə bağlı Almaniyanın Türkiyədəki səfiri bu gün səhər saatlarında Xarici İşlər Nazirliyinə çağırılıb və Almaniyadan izahat tələb edilib.

Beynəlxalq siyasətdə diqqət edilməsi vacib olan bəzi önəmli qanunların olduğunu xatırladan Davudoğlu iddialar doğru çıxarsa, Türkiyənin səssiz qalmayacağını bildirib:

"Almaniya hökuməti mütləq izahat verməlidir. Bu gün səfirdən izahat tələb olundu. Bu, eyni zamanda, əxlaqi bir məsuliyyətdir. Ona görə də Almaniya rəsmilərindən izahat gözləyirik. Əgər bu iddialar gerçək deyilsə, bununla bağlı addımlar atılmalıdır. Əgər bu iddialar gerçəkdirsə, bu mövzuda bizə ən dürüst izahat verilməlidir".