Millət vəkili Fazil Mustafa İlahiyyat məscidində gördüyü qəribə bir yazı barədə fikirlərini bölüşüb.

Axar.az xəbər verir ki, millət vəkili məscid rəhbərliyini sərt tənqid edərək məscidin hamıya aid olduğunu qeyd edib:

"Bu gün İlahiyat camisində sütundan asılmış qəribə bir xəbərdarlıq vərəqəsi diqqətimi cəlb etdi. Təqribən məzmunu belə idi: "Camidə kənar şəxslərə əlifba dərsi keçilməsinə və söhbət halqası qurulmasına icazə verilmir". Başqa yerlərdə camilərin qapısını açırlar ki, gəlin bir şeylər öyrənin, insanlar ibadətdən başqa həm də xeyirli işlər barədə söhbətlər aparırlar ki, cəmiyyətin faydasına bir əməl ortaya qoysunlar".

Ölkəni cəhalətin bürüdüyünü deyən millət vəkili islamın düzgün təqdim olunmadığını deyib:

"Əlbəttə, yazmaq olar ki, camidə terrora çağırış, dövlət quruluşu əleyhinə təbliğat, məzhəblərarası münasibəti zədələyən təbliğat aparmaq yasaqdır, bunu hər kəs anlayışla qarşılar və doğru hesab edər. Ancaq "söhbət həlqəsi" nə deməkdir, açığı, anlaya bilmədim. Nə demək istənilir, dairəvi şəkildə deyil, ancaq kvadrat şəklində söhbət aparmaq olar? Kimsə Qurani-Kərimdən başqasına ayə oxumaq və ya öyrətmək üçün caminin imamından icazəmi almalıdır? Bəlkə yazalar ki, məsciddə idmanla məşğul olmaq və ya əsnəmək qəti qadağandır? Bu qədər möhtəşəm bir əxlaq və zəka dini olan islamı belə təqdim etməyə görə ölkəni cəhalət başına götürüb".