Ana səhifə Planet |
ABŞ Rusiya əleyhinə sanksiya tətbiq edən ölkələrin dairəsini genişləndirməyə çalışır.
Axar.az xəbər verir ki, bu mövzuda Çin, Cənubi Koreya və Sinqapurla məsləhətləşmələr aparılır. Dövlət Departamentinin sanksiyalar siyasəti üzrə məsul şəxsi Deniel Frid Pekin, Seul və Sinqapurdan alınan cavabları açıqlamasa da, Şərqi Asiya ölkələrinin sanksiyalar paketinə qoşulmasına dair danışıqların davam etdirildiyini bildirib. Diplomat qeyd edib ki, Birləşmiş Ştatlar digər ölkələri də həmrəyliyə və Rusiyanı Ukraynaya qarşı yürütdüyü siyasətə görə cəzalandırmağa çağıracaq.
Rusiyanın AB, ABŞ və bir sıra digər ölkələrdən gətirilən məhsullara cavab sanksiyalarına gəldikdə isə, diplomat bildirib ki, Rusiya hökumətinin öz vətəndaşlarını xarici qidalardan məhrum edən hərəkətlərini anlamır. Onun fikrincə, Moskva sovet dövrünə doğru addımlamaqdadır:
"Nomenklaturadakılar keyfiyyətli məhsullarla təmin edilir, sadə insanlar isə bundan məhrum olurlar".
Dövlət departamentinin məmuru əmindir ki, AB və ABŞ-ın təzyiqləri gec də olsa, konkret nəticələr verəcək. Xüsusilə də söhbət burada Rusiya iqtisadiyyatının çökməsindən gedir: "Rusiya böyük mədəniyyəti və nəhəng intellektual kapitalı olan ölkədir. XXI əsrdə o, xeyirxahlığın ən başlıca mərkəzlərindən ola bilərdi. İndi orada baş verənlər fəlakətdir. Ümidvaram ki, günlərin bir xoş günü ruslar bunu dərk edəcək və biz yenidən konstruktiv münasibətlərimizə qayıdacağıq".
Tarix
2014.08.25 / 17:23
|
Müəllif
Təhminə C.B.
|