Horadiz mədəniyyət evi əsaslı təmirdən sonra Füzuli Dövlət Dram teatrının balansına verilib.

Füzuli Dövlət Dram teatrından Axar.az-a verilən məlumata görə, ölkədə mədəniyyət evlərinin və teatr binalarının təmiri və yenidən qurulması çərçivəsində Horadiz şəhər mədəniyyət evi əsaslı təmir olunub. Təmirdən sonra binanın birinci mərtəbəsində Füzuli Dövlət Dram Teatrı, ikinici mərtəbəsində isə rayon Mədəniyyət və Turizm şöbəsi və onun tabeliyində olan qurumlar fəaliyyət göstərir.

Mədəniyyət evi ümumi sahəsi 1472 kvadratmetr olan ikimərtəbəli binada yerləşir. Nümayiş zalında 135 tamaşaçı yeri var. Burada Füzuli Dövlət Dram Teatrının daha rahat şəraitdə fəaliyyəti nəzərə alınıb. Mədəniyyət və turizm naziri Əbülfəz Qarayev bu məqsədlə Horadiz mədəniyyət evini əmlakı ilə birlikdə Füzuli Dövlət Dram teatrının balansına verilməsi haqqında əmr imzalayıb.

Qeyd edək ki, 1989-cu ildə yenidən fəaliyyətə başlayan Füzuli Dövlət Dram Teatrı rayonun işğal edilməsindən sonra bir müddət Bakıda fəaliyyət göstərib. 2014-cü ildən isə teatr doğma torpağına qayıdaraq Horadizdə fəaliyyətini bərpa edib.