Ana səhifə Gündəm |
"Ermənistan helikopterinin Azərbaycan Ordusu tərəfindən vurulmasının məsuliyyəti tam olaraq Ermənistanın üzərinədədir. 90-cı illərdəki eyforiya dağılıb, vəziyyət gərgindir. İndi onların qorxuları var".
Bu sözləri Axar.az-a millət vəkili Zahid Oruc Azərbaycan ordusunun cəbhə xəttində hava sərhədini pozan erməni helikopterini vurması barədə danışarkən bildirib.
Millət vəkili qeyd edib ki, cəbhə xəttində baş vermiş bu hal bizə yox, Ermənistana baha başa gələcək:
"Reallığı nəzərə alın. 12 milyon dollarlıq vertolyot itirilib. Və üstəlik 3 nəfər şəxs itirilib. Bunun məsuliyyəti Ermənistan rəhbərliyinin çiynindədir. Söhbət Qarabağın 4,38 min kv.km-in üstündən uçuşlardan getsəydi və Azərbaycan uzaq mənzilli raketlərdən, texnikadan istifadə etsəydi, burada siyasi və hərbi ekspertlərin polemikasından söhbət gedə bilərdi. Əgər 7 rayonun 12,3 min kv kilometr ərazisinin üzərindən gələrək Ağdamın kəndi üzərində, real döyüş zonasında vertolyot uçursa, belə məqamda Azərbaycan Ordusu nə etməli idi? Ermənistan Müdafiə Nazirliyi açıqlama ilə çıxış etdi ki, guya bu vertolyot heç bir silaha, hərbi texnikaya malik deyil, sadəcə, hərbi təlim planlarını yerinə yetirir. Yəni sərhədi qoruyan Azərbaycan Ordusu hava sərhədini pozan helikopterin humanitar yardım aparan və ya mülki helikopter olduğunu anlamayıb? Belə olsaydı, deyərdik, Azərbaycan hövsələsizlik göstərib. Ancaq Azərbaycan Ordusu edilməsi gərəkəni edib. Bu məsələnin məsuliyyəti tam olaraq Ermənistanın üzərinədir. Onlar bilirlər ki, bu məsələni siyasi cəhətdən əleyhimizə yönəltməklə ölkə daxilindəki Sarkisyan rejiminə qarşı olanları hansısa yolla neytrallaşdıra bilərlər. Ona görə bu məsələni geniş miqyasda əleyhimizə yönəldirlər".
Z.Orucun fikrincə, bir helikopterin vurulması ərazilərimizin işğalından böyük hadisə deyil:
"Bu məsələni şişirdərək Qafqazda yanğın, Rusiyaya qarşı ikinci cəbhənin açılması, Azərbaycanın Avropaya getməsinə qarşı təxribatlar, avqust ayındakı iri miqyaslı tədbirlərin davamı kimi təqdim etmək yanlışdır, yolverilməzdir. Biz nə efyoriyadayıq, nə də böyük qələbə əhval-ruhiyyəsindəyik. Bir helikopterin vurulması ərazilərimizin işğalından böyük hadisə deyil! Çox uzun zaman bizə elə böyük məğlubiyyət yaşadılıb ki, indi öz müdafiəmizi gerçəkləşdirəndə də onun nəticələrini hesablamağa məcbur oluruq ki, dünya buna nə deyəcək? ATƏT-in Minsk Qrupunun bircə o işi qalıb ki, gedib erməni hərbi formasını geyinib bizə qarşı vuruşsun. Sərkisyan hadisədən sonra gecə Qarabağa gəlməklə sübut etdi ki, orada 90-cı illərdəki eyforiya dağılıb, vəzyət gərgindir, qorxuları var. Bizi belə adi işlərlə qorxutmasınlar".
Qeyd edək ki, dünən Ağdam rayonu ərazisində Ermənistan hərbi helikopteri Azərbaycanın təmas xətti üzərində uçuşlardan sonra ordumuz tərəfindən məhv edilib. Nəticədə Ermənistan ordusunun üç pilotu ölüb. Lakin rəsmi İrəvan helikopterin ona məxsus olduğu barədə məlumatları təkzib edib.
Tarix
2014.11.13 / 17:31
|
Müəllif
Nigar İxtiyarqızı
|