"Azərbaycanda bu il fermerlər aqrotexniki qaydalara əməl edə bilmədilər".

Bunu Axar.az-a aqrar sahə üzrə ekspert, aqronom Vahid Məhərrəmov hazırda kənd təsərrüfatındakı vəziyyətlə bağlı danışarkən deyib.

Meyvə-tərəvəz bazarında yaranmış qıtlığın səbəbləri haqda danışan ekspertin sözlərinə görə, ən böyük problem aqrotexniki qaydalara əməl edilməməsidr.

V.Məhərrəmov hesab edir ki, paralel olaraq sanksiyalar səbəbindən Rusiyanın öz bazarlarını Azərbaycanın daha geniş üzünə açması və şimal qonşumuza meyvə-tərəvəzin daşınmasının sürətlənməsi təbii olaraq ölkəmizdə bahalıq doğurur:

"Fermerlər üçün Rusiya bazarları əlverişlidir. Böyük həcmdə yüklər Rusiya bazarlarına aparılır. Bu da istər-istəməz bizim ölkə daxilində qiymətlərə təsir edir".

V.Məhərrəmovun sözlərinə görə, ilk növbədə fermerlərin suvarma problemi həllini tapmalıdır:

"Əvvəla, payız və yaz aylarında su bolluğu olur. Həmin vaxtlarda su anbarlara yığmalı idi. Çünki Azərbaycanda xeyli sayda göllər, hovuzlar, su anbarları var. Həmin anbarlara su bolluğu olanda ehtiyac su yığılmalıdır. Sonra suvarma suyuna ehtiyac yarananda fermerlərə həmin su verilməlidir".

Müsahibimiz çıxış yolu kimi məsul qurumlarının vahid sistemdə birləşməsini təklif edir: "Meliorasiya və Su Təsərrüfatı ASC, Azərenerji ASC, Ekologiya və Təbii Sərvətlər Nazirliyi su ilə bağlı vahid sistem yaradıb, suya olan ehtiyacı mərkəzləmiş qaydada həll etməlidirlər".