Ukrayna Prezidenti Pyotr Poroşenkonun Avropa Birliyinin Prezidenti Herman Van Rompuy ilə bu gün telefon danışığı olub.

Axar.az Unian-a istinadla xəbər verir ki, prezidentlər Ukraynadakı vəziyyət və Ukrayna-AB-Avrasiya İttifaqının sabah gözlənilən görüşü ilə bağlı müzakirələr aparıblar. Poroşenko Ukrayna sərhədində rus hərbi texnikasının toplanmasından və Rusiyanın növbəti "humanitar konvoyunun" ölkə ərazisinə keçirilməsindən ciddi narahatlığını ifadə edib. Ukrayna dövlət başçısı Avropanın mərkəzi sayılan bir ölkədə müharibənin dayandırılması üçün birgə tədbirlər görməyin vacibliyini də bildirib.

AB prezidenti qeyd edib ki, Ukrayna məsələsi AB-yə daxil olan ölkələrin prezident və hökumət başçılarının avqustun 30-da keçirilməsi gözlənilən iclasının ayrıca müzakirə predmeti ola bilər. Rompuy Poroşenko ilə avqustun 30-da Brüsseldə görüşməyə və problemi üzbəüz müzakirə etməyə hazır olduğunu da bildirib.