"Yutub" və "Vimeo" kimi video-paylaşım saytlarında Fətullah Gülənə aid olduğu iddia edilən yeni səs yazısı yayımlanıb.

"Axar.az" xəbər verir ki, bu səs yazısının 2013-cü ilin 17 dekabr tarixindən (korrupsiya əməliyyatında bir neçə nazir övladının həbs olunduğu gün. – red.) əvvəl qeydə alındığı iddia olunur. Səs yazısında Fətullah Gülənə məlumat verən şəxs Ukrayna, Qazaxıstan və Türkiyədə yerləşən "Yapı" Beynəlxalq İnşaat və Xarici Ticarət Şirkətinin sahibi Süleyman Həmid Müftigil olduğu iddia edilib. 17 dekabr tarixində qeydə alındığı bildirilən səs yazısında Fətullah Gülən 17 dekabr əməliyyatlarından xəbərdar olduğunu qeyd edib.

Apreldən sonra nazirləri biz təyin edəcəyik

Səs yazısında Fətullah Gülən aprel ayından sonra bir çox dövlət adamlarını təyin edəcəyini bildirir:

"Narahat olmayın. Aprel ayından sonra nazirləri, millət vəkillərini biz təyin edəcəyik".

"Ergenekon" kimi uzanacaq

Dialoqda Əli Ağaoğlu ilə bir neçə biznesmenin adı çəkilərək bu prosesin "Ergenekon" prosesi kimi uzanacağı bildirir:

"Vallah, mən onu bilmirəm. Ancaq bildiyim bir şey var - bu məsələ "Ergenekon" kimi uzanacaq. Seçkiyə qədər uzanacaq. Axırda da bütün hökuməti, Nazirlər Kabinetini devirəcək".

Bütün bunlarla bərabər yeni səs yazısında 70-ə yaxın millət vəkilinin AKP-dən istefa verəcəyi bildirilir. Həmçinin yeni bir partiyanın yaranacağı, o yeni partiyanın seçkilərdə 30 faiz səs toplayacağı vurğulanır.