"Həmin o bədnam erməni nazir müavini axırda söylədiyi fikirlərlə bəlkə də Ginnesin Rekordlar kitabına düşə biləcək "şedevr" ortaya qoyub".

Axar.az xəbər verir ki, bu açıqlama ilə hərbi ekspert Üzeyir Cəfərov öz Feysbuk səhifəsində çıxış edib.

O, Ermənistan Müdafiə naziri müavinin etdiyi hərəkətlərlə "rekordçu" ola biləcəyini deyib:

"Seyran Ohanyan "kişi"nin yaxşı komandası var. Elə onun 1-ci müavini David Tononyan adlı birisinin Naxçıvanda Azərbaycan, Türkiyə və Gürcüstan müdafiə nazirləri arasında görüşün nəticələrinin şərhini oxuyanda bu "dahi erməni sərkərdələrin" necə də yalan uydurmalarının bir daha şahidi oldum. Özlərini sakitləşdirmək üçün nazir müavini deyir ki, erməni tərəfini görüş faktı və onun nəticələri elə də narahat eləmir: "Mən hesab edirəm ki, məhz Gürcüstanın orada iştirakı üçtərəfli hərbi əməkdaşlığın Ermənistanın milli təhlükəsizliyi əleyhinə yönəlməsinə imkan verməyəcək". Səndə hardandır belə əminlik ki, sən gürcü dostlarımızın, o cümlədən digər iki türk ölkəsinin əvəzindən qərar verirsən? Gah Türkiyəyə sataşır, ondan qondarma "genosidi tanımağı" tələb edir, gah gürcülərə Cavaxetiya məsələsində "kəllə atır", gah da bizə ərazi iddiaları irəli sürür. Hiss edirlər ki, apardıqları kortəbii siyasət yavaş-yavaş onların sonunu yaxınlaşdırır.

Avqustun əvvəllərində təmas xəttinin ayrı-ayrı istiqamətlərində süni şəkildə yaratdıqları gərginliyin nəticəsində onlarla günahsız hərbçimiz dünyasını dəyişdi. Soçidə görüşdən dərhal sonra "Ələddinin sehrli çubuğu" işə düşdü və ermənilər sakitləşdilər. Görək, bunların hiyləgərliyinin budəfəki aralıq məsafəsi nə qədər çəkəcək?".