1896-cı ildə Afinada keçirilən ilk müasir olimpiya oyunlarının açılışından 118 il keçir.

"Axar.az" xəbər verir ki, bu gün Bakıda "Hilton" otelində İnkişaf və Sülh naminə 1-ci Beynəlxalq İdman Günü qeyd olunub. Tədbirin əsas təşkilatçıları Nəsillər Sülh Naminə (Generations for Peace) Azərbaycan təşkilatı, "Hilton" Bakı Oteli, BMT-nin İctimai İnformasiya Departamenti (UN DPİ) və "İnkişaf üçün İdman" İctimai Birliyidir.

Nəsillər Sülh Naminə Azərbaycan təşkilatının Milli Əlaqələndiricisi Aysel Əsgərova bu il ilk dəfə olaraq İnkişaf və Sülh naminə Beynəlxalq İdman Gününün qeyd edildiyini bildirdi. Onun sözlərinə görə, tədbirin keçirilməsində məqsəd məhz idman vasitəsilə ayrıseçkilik və müxfəlifliklərə yeni baxışı formalaşdırmaq və müxtəliflik, bərabərlik, qarşılıqlı hörmət və anlaşma kimi dəyərləri təbliğ etməkdir.

Xatırladaq ki, ilk müasir olimpiya oyunları 1896-cı ildə Yunanıstanın paytaxtı Afinada keçirilib. Həmin oyunların acılışı isə 1896-cı ilin aprelin 6-da baş tutub. BMT-nin Baş Assambleyasının 2013-cü ildə verilmiş qərarına əsasən, hər il 6 aprel tarixi Beynəlxalq İdman və Fiziki Aktivlik Günü kimi qeyd edilir.