Sumqayıtda asfalt üzərinə çəkilmiş Azərbaycan bayrağı sosial şəbəkələrdə və mediada ciddi müzakirələrə səbəb olub. Məsələ ilə bağlı Sumqayıt şəhər Gənclər və İdman Baş İdarəsindən açıqlama verilib. Açıqlamada deyilir:

"Ötən gün bəzi internet saytlarında Sumqayıtın İcra başçısının tapşırığına uyğun olaraq şəhərin prospektlərində asfaltın Azərbaycan bayrağı rəngində rənglənməsi və bu məsələnin sakinlərdə hiddət doğurması ilə bağlı məlumatlar yayılıb. Azərbaycan bayrağı hər birimiz üçün müqəddəsdir, əzizdir və yayılan məlumatlar əsassız, provokasiya xarakterlidir. Sumqayıtın küçələrinin birində məktəblilərin asfalt üzərində rəsm müsabiqəsi keçirilib. Şagirdlərin rəsmlərini tədbirə toplaşan minlərlə şəhər sakini alqışlarla qarşılayıblar. Sumqayıtda vətənpərvərlik mövzusunda tədbirlər prioritet istiqamət daşıyır və bu mövzuda ənənəvi olaraq müxtəlif tədbirlər keçirilir. Bu faktdır. Kimlərinsə müqəddəs hislərimizlə oynayaraq bu tədbiri öz çirkin məqsədlərinə çatmaq və provakasiya yaratmaq üçün istifadə etmək cəhdləri bizdə təəssüf və hiddət doğurur".("Xəbərlə.com")