Ana səhifə İqtisadiyyat |
Krımda bazar günü referendumun nəticələri başa çatar-çatmaz rusiyalı sahibkarlar artıq yarımadaya sərmayə qoymağa girişib.
"Axar.az" məlumat verir ki, bunların sırasında SSRİ və Rusiyanın Xalq artisti Alla Puqaçovanın qızı, müğənni Kristina Abrokaytenin çeçenəsilli keçmiş əri, sahibkar Ruslan Baysarov da yer alıb.
Verilən məlumata görə, o, Alşutoy və Feodosiya arasındakı sağlamlıq mərkəzinə 12 milyard rus rublu civarında sərmayə qoymağa hazırlaşır. Krımlı məmurlar sahibkarlara müxtəlif imtiyazlar və vergilərdən azad olunma kimi vədlər veriblər.
Bildirilir ki, Baysarovu Krım rəhbərliyinə Çeçenistan respublikasının rəhbəri Ramzan Kadırov təqdim edib. Kadırov bunu etiraf edərək, məsələ ilə əlaqədar Aksyonovla telefon danışığı apardığını vurğulayıb. Digər çeçen sahibkarlarının da müəyyən işlərə cəlb olunacağı gözlənilir.
Xatırladaq ki, Ruslan Baysarov Çeçenistan rəhbərinə olduqca yaxın sahibkarlardan sayılır və Qroznı şəhərinin yenidən qurulmasında onun maliyyə dəstəyindən istifadə olunub.
Məlumat üçün qeyd edək ki, Alla Puqaçovanın kiçik nəvəsinin atası Ruslan Baysarovdur.
Tarix
2014.03.19 / 01:33
|
Müəllif
Ruslan Məmmədoğlu
|