"Bakı Şəhər Bələdiyyəsinin yaradılması siyasi qərardan asılıdır".

Bu sözləri "Axar.az"ın Bakı Şəhər Bələdiyyəsinin yaradılmasıyla bağlı suallarını cavablandırarkən İqtisadi Tədqiqatlar Mərkəzinin eksperti Rəcəb İmanov dedi.

MDB məkanında şəhər bələdiyyəsi olmayan yeganə ölkə olduğumuzu bildirən ekspert hesab edir ki, Bakı Şəhər Bələdiyyəsi yaradılarsa, bu seçkili orqan olacaq və orda çalışan insanlar daha məsuliyyətli olacaqlar: "Bakı Şəhər Bələdiyyəsi seçkili qurum olacağı üçün onun hesabatlılığı da olacaq və məsuliyyət artacaq. Hesabatlılıq isə mövcud mexanizmlərin necə istifadə edilməsindən asılı olacaq".

Bakı Bələdiyyəsinə hələ hazır deyilik

Azərbaycanda Vətəndaş Cəmiyyətinin İnkişafına Yardım Assosiasiyasının eksperti Vüqar Tofiqli hesab edir ki, Bakı Şəhər Bələdiyyəsinin yaradılması üçün hələ müəyyən problemləri həll etmək lazımdır: "Parlamentdə Bakı Şəhər Bələdiyyəsi ilə bağlı müzakirələrin aparılması və onun gündəmə gətirilməsi mütərəqqi haldır. İlk olaraq nəzərə almaq lazımdır ki, bu bizim öhdəmizə götürdüyümüz məsələlərdən biridir. Digər bir məsələ isə onun verəcəyi üstünlüklərlə əlaqədardır. İlk olaraq onu qeyd edim ki, Bakı Şəhər Bələdiyyəsinin yaradılması bələdiyyə institutunun formalaşmasına gətirib çıxaracaq. Əgər bu gün vətəndaş hansısa məsələyə gözucu baxırsa, gələcəkdə o, bələdiyyə seçicisi olaraq, bu kimi problemlərin həllində maraqlı olacaq. Bir növ vətəndaşın öz çiyninə də yük düşəcək".

Ekspert eyni zamanda Bakı Şəhər Bələdiyyəsinin yaradılmasının real görünmədiyini də vurğuladı: "Hazırda Bakı Şəhər Bələdiyyəsinin yaradılması real görünmür. Çünki bunun üçün bizim nə hüquqi, nə də maddi-texniki bazamız var. Bakı bələdiyyəsinin büdcə gəliri hardasa 10 milyon manat ətrafındadır. Bu məbləğlə 4 milyon sakini olan bir şəhərdə heç bir iş görmək olmaz. Birinci növbədə hüquqi baza yaradılmalıdır. Daha sonra kadr potensialı müəyyən edilməlidir. Kimin hansı işi görəcəyini bilmək üçün vəzifə bölgüsü aparılmalıdır".