"Nəticə normal oldu. Yaxşı komandaya qarşı oynadıq. Mən "İnter"in 5 müdafiəçi ilə oynayacaqlarını gözləyirdim. Ancaq onlar 4 müdafiəçi ilə oynadılar. Bu da mənim üçün sürpriz oldu".

Axar.az-ın PFL-ə istinadən yaydığı xəbərə görə, bu sözləri "Qarabağ"ın baş məşqçisi Qurban Qurbanov "İnter"lə qolsuz bərabərə qaldıqları oyundan sonra deyib. O bildirib ki, "İnter"ə qarşı matç pis alınmayıb:

"Hər iki komanda intizamlı futbol sərgilədi. Müəyyən boşluqlar vardı ki, bunu normal qarşılamaq lazımdır. "İnter"ə uğurlar arzu edirəm. Bu komandaya qarşı görüşlər mənim üçün həmişə xoş olub".

"Belə görüşlərdə 1 top həlledici olur, qol olmasa da, keyfiyyətli oyun alındı".

Bu fikirləri isə "İnter"in baş məşqçisi Kaxaber Sxadadze səsləndirib. Sxadadzenin fikrincə, hər iki klub müdafiədə diqqətli oynadığından, adətən belə komandalar rəqibin səhvindən yararlanmağa çalışır:

"Heç-heçə isə ədalətli nəticədi. Düşünürəm ki, bu oyunu unutmalı və "Xəzər Lənkəran"la vacib qarşılaşmaya hazırlaşmalıyıq".