"Türkiyə Azərbaycana erməni məsələsində bir nömrəli müttəfiqidir".

Bu sözləri Axar.az-a açıqlamasında Yeni Türkiyə Strateji Araşdırmalar Mərkəzinin eksperti Orxan Qafarlı söyləyib.

O, Türkiyənin Azərbaycanın bir nömrəli müttəfiqi olduğunu bildirib:

"İki ölkə arasında 24 ilə yaxın strateji əməkdaşlıq mövcuddur. Türkiyə Azərbaycana erməni məsələsində bir nömrəli müttəfiqidir. Bu günə qədər Türkiyə Ermənistanla sərhədləri bağlı saxlamaqda enerji tranzit məsələsində Azərbaycana dəstək olmaqdadır. Hərbi əməkdaşlıqda Türkiyə bir nömrəli müttəfiqimizdir. Bu zaman ortaya çıxan sual budur ki, bu günə kimi iki ölkə arasında münasibətlərin bu qədər yaxşı olmasına baxmayaraq, Türkiyə vətəndaşları üçün Azərbaycanda vizanın qalması nə ilə bağlıdır? Bu, Ankara üçün anlaşılmazdır. Türkiyədə belə bir təəssürat var ki, Bakı səmimi deyil. Türkiyənin Cənubi Qafqaz bölgəsində siyasi, hərbi və iqtisadi olaraq daha da güclənməsi eyni zamanda regionda İpək yolu başda olmaqda digər strateji projelərin reallaşması üçün bu viza sisteminin aradan qalxması lazımdır. Yalnız bu şəkildə Azərbaycan, Gürcüstan və Ermənistan arasında əməkdaşlığın strateji xarakteri güclənə bilər".

Qeyd edək ki, bir müddət öncə Türkiyə Xarici İşlər nazirinin Azərbaycana ziyarəti zamanı iki ölkə arasındakı viza məsələsi yenidən gündəmə gəlmişdi.