Balıq ovuna görə son 10 il ərzində 1203 nəfər balıqçı məsuliyyətə cəlb edilib.

Axar.az xəbər verir ki, ölkədə 2004-2014-cü illər ərzində su bioresurslarının mühafizəsi və balıq ovu qaydalarına riayət edilməsi ilə bağlı ümumilikdə 1404 qanun pozuntusu aşkar edilib.

Həmin müddətdə qanun pozucularından 203 su nəqliyyat vasitəsi, 15057 ədəd müxtəlif adda ov aləti və 7150 ədəd müxtəlif növ qanunsuz ovlanmış balıq götürülüb. Cinayət xarakterli olduğuna görə balıqçılılarla bağlı 200 iş hüquq mühafizə orqanlarına göndərilib. 872 iş inzibati qaydada baxılması üçün aidiyyəti üzrə rayon məhkəmələrinə göndərilib və ya Su Hövzələrində Bioloji Resursların Artırılması və Mühafizəsi Departamentində baxılaraq müvafiq qərar qəbul edilib.

Qanunsuz balıq ovladığına və ya balıq ovu qaydalarını pozduğuna görə məsuliyyətə cəlb edilmiş qanun pozucuları barəsində balıq ehtiyatlarına vurduğu ziyana görə 418 666 manat məbləğində iddia qaldırılıb və onlara qarşı 157 763 manat məbləğində cərimə tətbiq edilib.